D'Schwätzer (s'Zygli vom Grosse Root)
Auch in diesem Jahr waren d'Schwätzer (s'Zygli vom Grossen Root) mit dem Sujet "alles ai Kindergarte" unterwegs.
D Schwätzer oder: Alles ai Kindergarte
Me kennts vom Spiilblatz, wenn glaini Gnepf,
die ainte mit Kurzhoor, die andre mit Zepf
im Sandkaschte zerscht friidligg dien sändele,
und bletzligg ganz gruusig dien händele.
„Daas isch my Kesseli“, deents vo doo
und d Antwort: „Du hesch mir my Schüüfeli gnoo.“
Wie im Sandkaschte gitts au z Basel so Arte
Im Grosse Root aka betreute Kindergarte
Alli schwätze statt uf em Sitzplatz z hogge
Dr Lärm haut dr Preesi fascht us de Sogge
Är lyttet und duet dr Leuthardt ermahne
„D Akkustik isch bleed, steen si neume andersch aane!“
Dä duet trotzig e baar Meter uf d Syte goo
Aber allewyl no im ganz lingge Egge stoh
Dr Remo zischt im e Ton, eme harte
Was isch dass au wider für e Kindergarte!
Bi Sachfrooge gseen die ainte schwarz, die andere rot
Bsunders, wenn’s um Verkehrsfrooge goot
„Das Strassenprojekt ist ein kompletter Käse“,
maint zimmligg verruggt dr Luca Urgese
„Ewägg mien die Parkblätz, Gopferdelli“
brielt grad so verruggt dr Jögge Vitelli
„Mir längts“, wietet denn dr Wieterich Michi:
„Dr näggscht, wo Parkblatz sait, dä erstich y!“
Drfiir will är denn no e Modäll fir d Fahrte
Kurz au do wider: Alles ai Kindergarte!
Um dr Routine und Langewyle usszwaiche
duet me denn gärn e Vorstoss yraiche.
Dr Unterwasser het do e Bombe-Idee:
spezielli Grabstai für d Fans vom FCB.
Vom Staat forderet dr Furrer Raphi,
dass dä Gmiessbeuftraiti schaffi.
Drzue no d Förderig vom Komposcht
S isch ganz egal, was daas denn koscht
Dr Wüethrich muess sich mit de Hündeler nümm guet stelle
Und hett die – also d Hünd – an d Laine näh welle
Stärbe die Hünd, denn duet me si, wenn me will
als Hot Dog am Rhy uf die neue Hofer-Grill.
Jeede duet no e sauglatte Vorstoss starte
Merci – sinn die im e Kindergarte!
Aini duet das mit em Kindergarte weertligg näh
und ihrem Goof im Rothuus dr Schoppe gäh
Dr Remo hett daas sofort als illegal gseh
und macht Familiebolitigg à la CVP
D Stimmig im Saal duet druff iberborde
D Lea isch zem „Steinle des Anstoss“ worde
Im Root ganz hinde wird denne sinniert
Isch ächtsch au d Züügig im Rothuus bassiert
„Nai“, maint d Lea, „Iir miend s doch raffe,
so äng dien do nie zwai zämmeschaffe.
Mit Liebi wird do sowieso nyt broduziert
wo zem e Broduggt noch numme nüün Monet fihrt
Fazit au do: Was willsch au erwarte
Dr Grossroot blyybt halt e ainzige Kindergarte!